4 tegnologiese landbou tendense regoor die wêreld om dop te hou

Tegnologiese vooruitgang word altyd vergesel deur innoverende idees en opwindende nuwe ontdekkings, en die landboubedryf is geen uitsondering nie. Boerderytegnologie bly aan die ontwikkel, soos mens in die ontwerp en vervaardiging van trekkers en toerusting kan sien. Moderne berekeningsmetodes stel boere in staat om hul oesopbrengs te monitor, te beheer en te vergroot.

Met so baie belowende moontlikhede, sien ons uit na ’n welvarende toekoms vir ons land se landbou. In die volgende artikel deel ons ’n keur van die landbou tendense om in 2016 en daarna dop te hou.

Geneties ontwerpte kos

Geneties ontwerpte kos staan jou dalk nie aan nie, maar die mensdom het hierdie tegnologiese vooruitgang broodnodig om te oorleef en floreer. In baie dele van die wêreld, veral in droogte-geteisterde gebiede, is daar ’n dringende behoefte aan metodes om gespesialiseerde sade te plant en te groei om ru, veranderlike klimate te weerstaan. Die hele wêreld sou ’n voedselkrisis in die gesig gestaar het as dit nie was vir ’n paar wetenskaplikes wat navorsing doen oor hoe om meer bestande gewasse te produseer nie. In teenstelling met geneties gewysigde voedsel, waarvan die DNA verander is op ’n manier wat nie natuurlik voorkom nie, word gene van ’n ander plant of dier in die geneties ontwerpte kos se DNA geplaas.

Landbou-robotte

Landbou-robotte sal in die toekoms standaardtoerusting word, veral wanneer plaaswerkers nie meer in staat sal wees om toesig te hou oor boerderyprosesse soos oes, vrugtepluk, plant en besproeiing nie. Wanneer ons aan robotte dink, is ons geneig om ’n prentjie te skep van vriendelike, mensagtige masjiene wat stap en praat soos wat ons in films sien. Maar wanneer ons oor landbourobotte praat, verwys ons na stem- en geoherkenningsagteware asook dataverwerking. Dink aan robotte in die landbou as soortgelyk aan ’n virtuele landerybestuurder waar besluite geneem word n.a.v. ingesamelde data. Dieselfde soort sagteware kan gebruik word om die weer te monitor. Hierdie tipe tegnologie sal verseker in die nabye toekoms veld wen.

Presisie landbou

Deur satellietbeelde, intelligente netwerke en sensors te gebruik, kan boere hul plase meer doeltreffend  bestuur deurdat hulle die intra-veld variasies in gewasse kan waarneem, meet en daarop kan reageer. Die versamelde data stel boere in staat om hul plaasopbrengs te verhoog en om hul plaasbestuurondersteuningstelsel te definieer, terwyl hulpbronne bewaar word. Deur oesafwykings en ​​weerstatistieke d.m.v. presisieboerderytegnieke te ontleed, kan boere beter besluite neem en ook hul saaitegnieke verbeter. Uiteindelik sal presisieboerderytegnologie ’n aanwins wees vir landerybestuur, spesifiek in oeswetenskap, omgewingsbewustheid en -beskerming en ekonomie.

Vertikale boerdery

Met ’n geskatte 7 miljard mense op aarde, plaas uitdyende verstedeliking druk op beskikbare grond vir landboudoeleindes. Beperkte ruimte dwing ’n mens byna om innoverend te wees, en hier neem vertikale boerdery die voortou. Vertikale boerdery gebruik tegnieke soortgelyk aan kweekhuise waar gewasse vertikaal teen ligweerkaatsende wolkekrabbers gekweek word. Gewasse word ook binnenshuis in vertikale houers gekweek soos in die prent hieronder. Daar is talle voordele verbonde aan vertikale boerdery, soos dat ’n mens regdeur die jaar kan oes, asook beskerming teen slegte weer, gereguleerde temperatuur, humiditeit- en ligbeheer, en die vermindering van produksie- en vervoerkoste. Die mees ongelooflike deel is dat vertikale boerdery nie grond vereis nie, en in plaas daarvan op voedselryke water staatmaak.